పట్టభద్రుల ఎమ్మెల్సీ ఎన్నికకు కసరత్తు.. సెప్టెంబర్ 28 నుంచి ఓటరు నమోదు

హైదరాబాద్‌-రంగారెడ్డి-మహబూబ్‌నగర్‌ పట్టభద్రుల ఎమ్మెల్సీ ఎన్నికకు ఎన్నికల సంఘం కసరత్తు ప్రారంభించింది. 2027 మార్చిలో పట్టభద్రుల ఎమ్మెల్సీ స్థానం పదవీకాలం ముగియనున్న నేపథ్యంలో కొత్త ఓటర్ల జాబితా తయారీ ప్రక్రియను ప్రారంభించారు. ఇందుకోసం ఎన్నికల సంఘం ప్రత్యేక షెడ్యూల్‌ను విడుదల చేసింది. ఎన్నికల షెడ్యూల్‌ ప్రకారం పట్టభద్రుల ఓటర్ల నమోదుకు సెప్టెంబర్‌ 28న నోటిఫికేషన్‌ విడుదల చేయనున్నారు. సెప్టెంబర్‌ 28 నుంచి నవంబర్‌ 6 వరకు ఫారం-18 దరఖాస్తులను స్వీకరించనున్నారు. అనంతరం నవంబర్‌ 25న ముసాయిదా ఓటర్ల జాబితాను ప్రకటిస్తారు. ఈ జాబితాపై అభ్యంతరాలను నవంబర్‌ 25 నుంచి డిసెంబర్‌ 10 వరకు స్వీకరిస్తారు. డిసెంబర్‌ 30న తుది పట్టభద్రుల ఓటర్ల జాబితాను విడుదల చేయనున్నారు. ఇప్పటికే పట్టభద్రుల ఎమ్మెల్సీ ఎన్నికల్లో ఓటరుగా నమోదైన వారు కూడా ఈసారి కొత్తగా ఫారం-18 దరఖాస్తు సమర్పించాల్సి ఉంటుందని ఎన్నికల సంఘం స్పష్టం చేసింది. ఓటర్ల జాబితాను కొత్తగా రూపొందించే ప్రక్రియలో భాగంగా పాత ఓటర్ల వివరాలను కూడా తిరిగి నమోదు చేయనున్నారు. పట్టభద్రులు ఈఆర్వోలు, ఏఈఆర్వోలు, ఎన్నికల సంఘం నియమించిన అధికారుల వద్ద ఆఫ్‌లైన్‌లో దరఖాస్తు చేసుకోవచ్చు. అలాగే ఆన్‌లైన్‌ ద్వారా కూడా దరఖాస్తు చేసుకునే అవకాశం కల్పించారు. దరఖాస్తుతో పాటు డిగ్రీ పూర్తయినట్లు ధ్రువీకరణ పత్రాలను జత చేయాల్సి ఉంటుంది. నవంబర్‌ 1వ తేదీ నాటికి మూడేళ్ల డిగ్రీ పూర్తి చేసిన వారు పట్టభద్రుల ఎమ్మెల్సీ ఓటరుగా నమోదు చేసుకునేందుకు అర్హులుగా ఉంటారు. అర్హత కలిగిన అభ్యర్థులు తెలంగాణ రాష్ట్ర ప్రధాన ఎన్నికల అధికారి అధికారిక వెబ్‌సైట్‌ ద్వారా దరఖాస్తు చేసుకోవచ్చు. పోస్టు ద్వారా కూడా దరఖాస్తులు స్వీకరించేందుకు ఏర్పాట్లు చేసినట్లు సమాచారం. హైదరాబాద్‌-రంగారెడ్డి-మహబూబ్‌నగర్‌ పట్టభద్రుల ఎమ్మెల్సీ స్థానం రాష్ట్రంలో కీలకమైన నియోజకవర్గంగా మారింది. ఈ ప్రాంతంలో అధిక సంఖ్యలో పట్టభద్రులు ఉండటంతో ప్రధాన రాజకీయ పార్టీలు కూడా ఓటర్ల నమోదుపై దృష్టి సారిస్తున్నాయి. గతంలో 5.3 లక్షల మంది ఓటర్లు ఉండగా, ఈసారి ఓటర్ల సంఖ్య 7 లక్షల నుంచి 8 లక్షల వరకు పెరిగే అవకాశం ఉందని అంచనా వేస్తున్నారు. ఓటరు నమోదు ప్రక్రియ ప్రారంభం కానున్న నేపథ్యంలో రాజకీయ పార్టీలు ఇప్పటికే క్షేత్రస్థాయిలో సమావేశాలు నిర్వహిస్తున్నాయి. ఎక్కువ సంఖ్యలో పట్టభద్రులను ఓటర్లుగా నమోదు చేయించేందుకు ప్రయత్నాలు చేస్తున్నాయి. ఉద్యోగ, ఉపాధ్యాయ సంఘాలు, నిరుద్యోగ యువతపై ప్రత్యేక దృష్టి పెట్టినట్లు సమాచారం. పట్టభద్రుల ఎమ్మెల్సీ ఎన్నికకు సంబంధించి ఓటర్ల నమోదు ప్రక్రియ సజావుగా నిర్వహించేందుకు అధికారులు ఏర్పాట్లు చేస్తున్నారు. అర్హత కలిగిన పట్టభద్రులు గడువులోపు దరఖాస్తు చేసుకోవాలని సూచిస్తున్నారు.