ప్రిన్స్ రహీమ్ అగా ఖాన్‌తో సీఎం రేవంత్ భేటీ.. మూసీపై కీలక చర్చలు

హైదరాబాద్, సెప్టెంబర్ 15: ముఖ్యమంత్రి రేవంత్ రెడ్డి మంగళవారం తాజ్ ఫలక్‌నుమా ప్యాలెస్‌లో ప్రిన్స్ రహీమ్ అగా ఖాన్-Vతో సమావేశమయ్యారు. ఈ సందర్భంగా హైదరాబాద్ వారసత్వ సంపద పరిరక్షణ, మూసీ నది పునరుజ్జీవనం, చారిత్రక భవనాల పునరుద్ధరణ తదితర అంశాలపై చర్చించారు. అగా ఖాన్ ఫౌండేషన్‌పై తమకు ఎంతో గౌరవం ఉందని సీఎం రేవంత్ రెడ్డి తెలిపారు. తెలంగాణలోని వారసత్వ సంపద పునరుద్ధరణలో ఫౌండేషన్ కీలక పాత్ర పోషిస్తోందన్నారు. అగా ఖాన్ ఫౌండేషన్ సహకారంతో శాసనమండలి భవనం పునరుద్ధరణ జరిగిందని, అలాగే కుతుబ్ షాహీ టూంబ్స్ పునరుద్ధరణలోనూ ఫౌండేషన్ ముఖ్యమైన పాత్ర పోషించిందని సీఎం పేర్కొన్నారు. మూసీ నది పునరుజ్జీవనం కోసం తెలంగాణ ప్రభుత్వం ప్రణాళికలు సిద్ధం చేస్తోందని రేవంత్ రెడ్డి తెలిపారు. మూసీ పరివాహక ప్రాంతంలోని సిటీ కాలేజ్, ఉస్మానియా ఆసుపత్రి వంటి చారిత్రక భవనాల పునరుద్ధరణకు అగా ఖాన్ ఫౌండేషన్ సహకారం కోరుతున్నట్లు వెల్లడించారు. ఉస్మానియా ఆసుపత్రి కోసం గోషామహల్‌లో కొత్త భవనాన్ని నిర్మిస్తున్నామని సీఎం తెలిపారు. ప్రస్తుతం ఉన్న ఉస్మానియా ఆసుపత్రి భవనాన్ని భవిష్యత్తులో వారసత్వ కట్టడంగా తీర్చిదిద్దాలని ప్రభుత్వం భావిస్తోందన్నారు. అలాగే మూసీ నదిని నైట్ ఎకానమీ అభివృద్ధికి అనుకూలంగా తీర్చిదిద్దే ప్రణాళికలు ఉన్నాయని చెప్పారు. ఈ సందర్భంగా డిసెంబర్ 7, 8, 9 తేదీల్లో ఫ్యూచర్ సిటీలో తెలంగాణ గ్లోబల్ సమ్మిట్ నిర్వహించనున్నట్లు సీఎం రేవంత్ రెడ్డి తెలిపారు. 100కు పైగా దేశాల ప్రతినిధులు ఈ సమ్మిట్‌కు హాజరయ్యే అవకాశం ఉందన్నారు. ఈ కార్యక్రమానికి తప్పకుండా హాజరు కావాలని ప్రిన్స్ రహీమ్ అగా ఖాన్-Vను సీఎం ఆహ్వానించారు. 2047 నాటికి దేశ జీడీపీలో తెలంగాణ వాటాను 10 శాతానికి పెంచే లక్ష్యంతో ప్రభుత్వం పనిచేస్తోందని సీఎం తెలిపారు. సుమారు 30 వేల ఎకరాల్లో ఫ్యూచర్ సిటీని అభివృద్ధి చేస్తున్నామని, దానిని నెట్-జీరో సిటీగా తీర్చిదిద్దే లక్ష్యం ఉందన్నారు. విమానాశ్రయానికి సుమారు 20 నిమిషాల దూరంలో ఫ్యూచర్ సిటీని అభివృద్ధి చేస్తున్నట్లు పేర్కొన్నారు. ఫ్యూచర్ సిటీ మాస్టర్ ప్లాన్‌ను సింగపూర్‌కు చెందిన సంస్థ రూపొందిస్తోందని, ఇందులో సుమారు 15 వేల ఎకరాల్లో గ్రీన్ జోన్ ఏర్పాటు చేస్తున్నామని సీఎం తెలిపారు. అమెజాన్ వంటి సంస్థలు ఇప్పటికే ఫ్యూచర్ సిటీలో తమ కార్యకలాపాలను ప్రారంభించాయని రేవంత్ రెడ్డి పేర్కొన్నారు.