నల్లగొండలో కేటీఆర్‌ పాదయాత్ర చేస్తే.. నేనూ చేస్తా: మంత్రి కోమటిరెడ్డి

తెలంగాణ మంత్రి కోమటిరెడ్డి వెంకట్‌రెడ్డి నల్లగొండలో అభివృద్ధి పనులు, రాష్ట్ర ప్రభుత్వ కార్యక్రమాలు, కేటీఆర్‌ పాదయాత్రపై కీలక వ్యాఖ్యలు చేశారు. కాంగ్రెస్‌ ప్రజా ప్రభుత్వం ఏర్పడి డిసెంబర్‌ నాటికి మూడేళ్లు పూర్తవుతాయని ఆయన తెలిపారు. దేశంలో లేని పథకాలను ప్రజా ప్రభుత్వం అమలు చేస్తోందని పేర్కొన్నారు. నల్లగొండ జిల్లాలో రూ.1,000 కోట్లతో అభివృద్ధి పనులు చేపట్టనున్నట్లు మంత్రి వెల్లడించారు. రోడ్ల అభివృద్ధికి ప్రభుత్వం ప్రత్యేక ప్రాధాన్యం ఇస్తోందని తెలిపారు. తెలంగాణలోని ప్రతి మండల కేంద్రం నుంచి జిల్లా కేంద్రాలకు రెండేళ్లలో డబుల్‌ రోడ్లు నిర్మించేందుకు చర్యలు తీసుకుంటున్నామని చెప్పారు. హడ్కో రుణంతో హ్యామ్‌ రోడ్ల పనులను కూడా చేపడుతున్నట్లు వివరించారు. రోడ్లు బాగుంటేనే రాష్ట్రం అభివృద్ధి చెందుతుందని కోమటిరెడ్డి వెంకట్‌రెడ్డి అన్నారు. హైదరాబాద్‌-విజయవాడ మధ్య ఆరు లైన్ల రహదారి నిర్మాణానికి రూ.12,073 కోట్లతో అక్టోబర్‌లో టెండర్లు పిలవనున్నట్లు తెలిపారు. జనవరిలో పనులు ప్రారంభించి 18 నెలల్లో పూర్తి చేయాలని లక్ష్యంగా పెట్టుకున్నట్లు చెప్పారు. ఇదే సమయంలో కేటీఆర్‌ నల్లగొండ జిల్లాలో పాదయాత్ర చేస్తే తాను కూడా పాదయాత్ర చేస్తానని మంత్రి కోమటిరెడ్డి వెంకట్‌రెడ్డి స్పష్టం చేశారు. ఈ వ్యాఖ్యలు తెలంగాణ రాజకీయ వర్గాల్లో ఆసక్తిని రేకెత్తిస్తున్నాయి.