జాబ్‌ల పేరుతో మోసం.. నిరుద్యోగ యువతను టార్గెట్ చేస్తున్న కేటుగాళ్లు

ఉద్యోగాల కోసం ఎదురుచూస్తున్న నిరుద్యోగ యువతను లక్ష్యంగా చేసుకుని కొంతమంది మోసగాళ్లు కొత్త తరహా మోసాలకు పాల్పడుతున్నారు. ఉద్యోగాలు ఇప్పిస్తామనే ఆశ చూపించి యువత నుంచి లక్షల్లో డబ్బులు వసూలు చేస్తున్న ఘటనలు వరంగల్ ప్రాంతంలో వెలుగులోకి వస్తున్నాయి. ప్రభుత్వ, ప్రైవేట్ సంస్థల్లో ఉద్యోగాలు ఇప్పిస్తామని నమ్మిస్తూ సోషల్ మీడియా వేదికగా ఆకర్షణీయమైన ప్రకటనలు ఇస్తూ మోసాలకు పాల్పడుతున్నారు. ఇన్‌స్టాగ్రామ్, వాట్సాప్ గ్రూపులు, టెలిగ్రామ్, ఫేస్‌బుక్ వంటి సామాజిక మాధ్యమాలను కొంతమంది మోసగాళ్లు తమ కార్యకలాపాలకు ఉపయోగిస్తున్నట్లు సమాచారం. నో ఎగ్జామ్ జాబ్, గ్యారెంటీ ఉద్యోగం, డైరెక్ట్ రిక్రూట్‌మెంట్, వాక్-ఇన్ ఇంటర్వ్యూ వంటి ఆకర్షణీయమైన ప్రకటనలతో యువతను ఆకర్షిస్తున్నారు. నకిలీ కంపెనీ లోగోలు, ఫేక్ మెయిల్స్, తప్పుడు నియామక వివరాలతో ఉద్యోగార్థులను నమ్మించే ప్రయత్నాలు చేస్తున్నారు. ఉద్యోగం ఇప్పిస్తామని నమ్మించేందుకు కొంతమంది నకిలీ పత్రాలను కూడా చూపిస్తున్నారు. గతంలో పలువురికి ఉద్యోగాలు ఇప్పించామని చెప్పడానికి ఫేక్ అపాయింట్‌మెంట్ లెటర్లు, ఇతర పత్రాలను చూపించి బాధితులను నమ్మిస్తున్నారు. మొదట చిన్న మొత్తాల్లో డబ్బులు తీసుకుంటూ, తర్వాత సెక్యూరిటీ డిపాజిట్, డాక్యుమెంట్ వెరిఫికేషన్, రిఫండబుల్ ఫీజుల పేరుతో పెద్ద మొత్తాల్లో డబ్బులు వసూలు చేస్తున్నారు. డబ్బులు చెల్లించిన తర్వాత ఉద్యోగ నియామకం జరగకపోవడంతో బాధితులు మోసపోయామని గుర్తిస్తున్నారు. నిందితులను సంప్రదించేందుకు ప్రయత్నించినప్పుడు ఫోన్లు స్విచ్ఛాఫ్ చేయడం లేదా కనిపించకుండా పోవడం జరుగుతోందని సమాచారం. దీంతో పలువురు బాధితులు పోలీసులను ఆశ్రయిస్తున్నారు. ఈ ఏడాది వరంగల్ పరిధిలో పలు ఉద్యోగ మోసాల కేసులు నమోదయ్యాయి. హసన్‌పర్తి పోలీస్ స్టేషన్ పరిధిలో గ్రేటర్ వరంగల్ మున్సిపల్ కార్పొరేషన్‌లో ఉద్యోగం ఇప్పిస్తానని చెప్పి రూ.10 లక్షలు తీసుకున్న ఘటనపై కేసు నమోదైంది. అలాగే హనుమకొండ పోలీస్ స్టేషన్ పరిధిలో జూనియర్ అసిస్టెంట్ ఉద్యోగం పేరుతో రూ.3.60 లక్షలు తీసుకుని మోసం చేసిన ఘటన నమోదైంది. రైల్వే ఉద్యోగం ఇప్పిస్తానని రూ.6 లక్షలు తీసుకున్న ఘటనపై దామెర పోలీస్ స్టేషన్‌లో కేసు నమోదైంది. మరో ఘటనలో జూనియర్ అసిస్టెంట్ ఉద్యోగం పేరుతో రూ.2.90 లక్షలు తీసుకుని మోసం చేసినట్లు ఫిర్యాదు నమోదైంది. తాజాగా ఉద్యోగాలు ఇప్పిస్తానని పలువురిని మోసం చేసిన వ్యక్తి నుంచి రూ.85 లక్షలు, నాలుగు తులాల బంగారం స్వాధీనం చేసుకుని కాజీపేట పోలీసులు అరెస్టు చేశారు. ఉద్యోగం కోసం డబ్బులు చెల్లించడం మోసానికి దారితీసే అవకాశం ఉందని పోలీసులు హెచ్చరిస్తున్నారు. ఉద్యోగ నోటిఫికేషన్లు ఇచ్చే సంస్థలు, వ్యక్తుల వివరాలను అధికారికంగా ధృవీకరించుకోవాలని సూచిస్తున్నారు. రిజిస్ట్రేషన్ ఫీజులు లేదా ఇతర చార్జీలు చెల్లించే ముందు సంస్థ నిజమైనదా కాదా పరిశీలించాలని అధికారులు సూచించారు