రీల్ కోసం నదిలోకి స్కార్పియో.. వేగవంతమైన ప్రవాహంలో చిక్కుకున్న యువకులు

సోనామార్గ్: సోషల్ మీడియాలో రీల్ కోసం చేసిన ఓ ప్రమాదకర స్టంట్ యువకుల ప్రాణాల మీదకు తెచ్చింది. జమ్మూ కాశ్మీర్‌లోని సోనామార్గ్‌లో హోటల్ సింధ్ రిసార్ట్స్ సమీపంలో వేగంగా ప్రవహిస్తున్న సింధు నదిలోకి కొందరు యువకులు స్కార్పియో వాహనాన్ని నడిపినట్లు ఆరోపణలు ఉన్నాయి. వీడియో చిత్రీకరణ కోసం వాహనాన్ని నదిలోకి తీసుకెళ్లగా.. కొద్దిసేపటికే బలమైన నీటి ప్రవాహంలో స్కార్పియో చిక్కుకుపోయింది. దీంతో వాహనంలోని యువకులు నది మధ్యలో చిక్కుకుని కొట్టుకుపోయే ప్రమాదం ఏర్పడింది. విషయం తెలుసుకున్న పోలీసులు, స్థానికులు వెంటనే ఘటనాస్థలానికి చేరుకుని సహాయక చర్యలు చేపట్టారు. వారి ప్రయత్నాలతో వాహనంలోని యువకులను సురక్షితంగా నది ఒడ్డుకు చేర్చారు. అనంతరం స్కార్పియోను కూడా నది నుంచి వెలికితీశారు. పోలీసులు డ్రైవర్‌ను శ్రీనగర్ నవాకడల్‌కు చెందిన మహ్మద్ ఇబాద్ భట్‌గా, మరో ప్రయాణికుడిని రియాసిలోని మహోర్‌కు చెందిన నసీర్ అహ్మద్ ముగల్‌గా గుర్తించారు. రీల్ కోసం వాహనాన్ని నదిలోకి నడపడం తీవ్ర నిర్లక్ష్యమని పోలీసులు పేర్కొన్నారు. ఈ ఘటనపై ఎఫ్‌ఐఆర్ కూడా నమోదు చేశారు. సోషల్ మీడియాలో వైరల్ కావాలనే ఉద్దేశంతో ప్రమాదకరమైన ప్రదేశాల్లో స్టంట్లు చేయడం ఎంతటి ప్రమాదానికి దారితీస్తుందో ఈ ఘటన మరోసారి చూపించింది. ముఖ్యంగా వేగంగా ప్రవహించే నదులు, వాగులు వంటి ప్రాంతాల్లో చిన్న పొరపాటు కూడా ప్రాణాంతకంగా మారే అవకాశం ఉంది.