సాహితీ ఇన్‌ఫ్రా కేసులో ఈడీ విచారణకు ఎమ్మెల్యే ఆరెకపూడి గాంధీ

సాహితీ ఇన్‌ఫ్రా కేసులో శేరిలింగంపల్లి ఎమ్మెల్యే ఆరెకపూడి గాంధీకి ఎన్‌ఫోర్స్‌మెంట్ డైరెక్టరేట్ (ఈడీ) నోటీసులు జారీ చేసింది. ఆదివారం విచారణకు హాజరు కావాలని ఈడీ అధికారులు నోటీసుల్లో పేర్కొన్నారు. సాహితీ ఇన్‌ఫ్రా సంస్థకు సంబంధించిన ఆర్థిక లావాదేవీలపై దర్యాప్తు చేస్తున్న ఈడీ అధికారులు, సంస్థ ఖాతా నుంచి ఎమ్మెల్యే ఆరెకపూడి గాంధీ బ్యాంక్ ఖాతాలకు రూ.2.1 కోట్లు బదిలీ అయినట్లు గుర్తించినట్లు సమాచారం. ఈ నగదు బదిలీలకు సంబంధించిన కారణాలు, లావాదేవీల వివరాలను తెలుసుకునేందుకు విచారణకు పిలిచినట్లు తెలుస్తోంది. ఫ్లాట్లు, విల్లాలు నిర్మించి ఇస్తామంటూ ఫ్రీ లాంచ్ ఆఫర్ల పేరుతో సాహితీ ఇన్‌ఫ్రా సంస్థ కొనుగోలుదారుల నుంచి పెద్ద మొత్తంలో డబ్బులు సేకరించినట్లు ఆరోపణలు ఉన్నాయి. అనంతరం ఆ నగదును పక్కదారి పట్టించారనే ఆరోపణలపై పోలీసులు కేసు నమోదు చేసి దర్యాప్తు ప్రారంభించారు. ఈ వ్యవహారంలో ఈడీ కూడా రంగంలోకి దిగింది. పోలీసుల ఎఫ్‌ఐఆర్ ఆధారంగా మనీలాండరింగ్ కోణంలో దర్యాప్తు చేపట్టింది. ప్రాథమిక దర్యాప్తులో సాహితీ ఇన్‌ఫ్రా సంస్థ ఫ్రీ లాంచ్ పేరుతో ప్రజల నుంచి రూ.258 కోట్లు వసూలు చేసినట్లు పోలీసులు గుర్తించినట్లు సమాచారం. అయితే తదుపరి దర్యాప్తులో ఆధారాల ఆధారంగా మోసం జరిగిన మొత్తం రూ.842 కోట్ల వరకు ఉన్నట్లు గుర్తించినట్లు అధికారులు తెలిపారు. ఈ కేసులో సంస్థ ఎండీని ఇప్పటికే పోలీసులు అరెస్ట్ చేశారు. అలాగే సంస్థకు సంబంధించిన బ్యాంక్ ఖాతాలను స్తంభింపజేశారు. సాహితీ ఇన్‌ఫ్రా సంస్థ ఆస్తులను కూడా ఈడీ అటాచ్ చేసినట్లు సమాచారం. ఆర్థిక లావాదేవీలు, నిధుల బదిలీలు, సంబంధిత వ్యక్తుల పాత్రపై ఈడీ అధికారులు దర్యాప్తు కొనసాగిస్తున్నారు. ఎమ్మెల్యే ఆరెకపూడి గాంధీకి జారీ చేసిన నోటీసుల నేపథ్యంలో ఈ కేసు మరోసారి చర్చనీయాంశంగా మారింది. విచారణలో భాగంగా ఈడీ అధికారులు సంబంధిత లావాదేవీలు, వాటి ఉద్దేశాలు, నిధుల వినియోగంపై వివరాలు సేకరించే అవకాశం ఉంది. ఈ కేసులో దర్యాప్తు కొనసాగుతున్నందున, విచారణ పూర్తయ్యే వరకు ఆరోపణలకు సంబంధించిన పూర్తి వివరాలు అధికారికంగా వెల్లడయ్యే అవకాశం ఉంది.