పర్యాటకం.. సౌందర్యం కలయిక.. ప్రపంచవ్యాప్తంగా పెరుగుతున్న ‘గ్లోకేషన్’ ట్రెండ్
ప్రపంచ పర్యాటక రంగంలో కొత్త ట్రెండ్గా ‘గ్లోకేషన్’ (Glowcation) వేగంగా ప్రాచుర్యం పొందుతోంది. విహార యాత్రతో పాటు చర్మ సంరక్షణ, వెల్నెస్ ట్రీట్మెంట్లను కలిపిన ప్రత్యేక ప్రయాణ విధానమే ఇది. దక్షిణ కొరియాలోని సియోల్, ఫ్రాన్స్లోని ప్యారిస్, మొరాకోలోని హమామ్లు, జపాన్లోని బెప్పు, ఐస్లాండ్లోని బ్లూ లాగూన్ వంటి ప్రాంతాలు గ్లోకేషన్ టూర్లకు ప్రసిద్ధి చెందాయి. పర్యాటకులు అందమైన ప్రదేశాలను సందర్శించడంతో పాటు సౌందర్య, ఆరోగ్య సంరక్షణ అనుభూతులను కూడా పొందుతున్నారు.
పర్యాటక రంగంలో రోజురోజుకూ కొత్త కొత్త ట్రెండ్లు పుట్టుకొస్తున్నాయి. తీర్థ యాత్రలు, విహార యాత్రలు, ఆరోగ్య యాత్రలు, ఆహార యాత్రలు, ప్రకృతి యాత్రల తర్వాత తాజాగా ‘గ్లోకేషన్’ అనే కొత్త ప్రయాణ విధానం ప్రాచుర్యంలోకి వచ్చింది.
గ్లోకేషన్ అంటే వెకేషన్ (Vacation)తో పాటు చర్మ సంరక్షణ (Skincare), వెల్నెస్ ట్రీట్మెంట్లను కలిపిన ప్రత్యేకమైన ప్రయాణ అనుభవం. సాధారణంగా పర్యాటకులు కొత్త ప్రదేశాలను సందర్శించి తిరిగి వస్తారు. కానీ గ్లోకేషన్ యాత్రల్లో అందమైన ప్రదేశాలను చూడటంతో పాటు చర్మ సంరక్షణ, స్పా ట్రీట్మెంట్లు, ఆరోగ్య సంరక్షణ పద్ధతులను కూడా అనుభవిస్తారు.
ప్రపంచ పర్యాటక దినోత్సవం సందర్భంగా ఈ కొత్త ట్రావెల్ కాన్సెప్ట్పై ఆసక్తి పెరుగుతోంది. పర్యాటకులు కేవలం విశ్రాంతి కోసం మాత్రమే కాకుండా తమ శారీరక, మానసిక ఆరోగ్యాన్ని మెరుగుపరుచుకునేందుకు కూడా ప్రయాణాలను ఎంచుకుంటున్నారు.
దక్షిణ కొరియా.. చర్మ సౌందర్యానికి కేంద్రం
దక్షిణ కొరియా రాజధాని సియోల్ గ్లోకేషన్ టూర్లలో ప్రముఖ స్థానాన్ని సంపాదించింది. గత కొన్నేళ్లుగా చర్మ సంరక్షణ రంగంలో అనేక ప్రయోగాలు చేసిన సియోల్, ప్రపంచవ్యాప్తంగా కె-బ్యూటీకి ప్రసిద్ధి చెందింది.
సియోల్లోని ఆప్గుజాంగ్ రోడియో వంటి ప్రాంతాల్లో అనేక స్కిన్కేర్ క్లినిక్లు ఉన్నాయి. స్కిన్ బూస్టర్లు, లేజర్ ట్రీట్మెంట్లు వంటి ఆధునిక చికిత్సలు అందుబాటులో ఉంటాయి. మియాంగ్డంగ్ ప్రాంతం కె-బ్యూటీ ఉత్పత్తులకు ప్రసిద్ధి చెందింది.
ప్యారిస్.. ఫ్యాషన్తో పాటు స్కిన్కేర్
ఫ్రాన్స్ రాజధాని ప్యారిస్ కేవలం ఫ్యాషన్కు మాత్రమే కాదు, చర్మ సంరక్షణకు కూడా ప్రసిద్ధి చెందింది. అక్కడి స్కిన్కేర్ ఉత్పత్తులు ప్రపంచవ్యాప్తంగా గుర్తింపు పొందాయి.
ప్యారిస్లోని ఫార్మసీల్లో చర్మతత్వం, వయసు, అవసరాలకు అనుగుణంగా ఉత్పత్తులను సూచించడం ప్రత్యేకతగా చెప్పవచ్చు. అందుకే పర్యాటకులు నగర సందర్శనతో పాటు స్కిన్కేర్ షాపింగ్, వెల్నెస్ సేవలను కూడా ఆస్వాదిస్తున్నారు.
మొరాకో.. సంప్రదాయ హమామ్ అనుభవం
ఆఫ్రికాలోని మొరాకో దేశం హమామ్ అనే సంప్రదాయ స్నాన విధానాలకు ప్రసిద్ధి చెందింది. ఆవిరి స్నానం, మట్టి చికిత్స, మర్దన వంటి పద్ధతులతో శరీరానికి విశ్రాంతి కలిగించే విధానమే హమామ్.
మారకేష్ నగరంలోని మదీనా క్వార్టర్లో ఉన్న హమామ్లు పర్యాటకులను ఆకర్షిస్తున్నాయి. శరీరంతో పాటు మనసుకు కూడా ప్రశాంతత కలిగిస్తాయని వీటికి పేరు ఉంది.
జపాన్.. ఆరోగ్యకరమైన ఉష్ణగుండాలు
జపాన్లోని బెప్పు నగరం సహజ ఉష్ణగుండాలకు ప్రసిద్ధి చెందింది. వివిధ ఖనిజాలతో కూడిన నీటి గుండాలు ఆరోగ్య ప్రయోజనాలను అందిస్తాయని అక్కడి ప్రజలు నమ్ముతారు.
సల్ఫర్, ఇనుము వంటి ఖనిజాలు కలిగిన నీటిలో స్నానం చేయడం ద్వారా చర్మానికి ప్రయోజనం ఉంటుందని పర్యాటకులు భావిస్తారు.
ఐస్లాండ్.. బ్లూ లాగూన్ ఆకర్షణ
ఐస్లాండ్లోని బ్లూ లాగూన్ కూడా గ్లోకేషన్ టూర్లలో ప్రముఖ ప్రదేశంగా మారింది. సిలికా, ఆల్గే వంటి సహజ పదార్థాలు కలిగిన నీటికి చర్మ సంరక్షణ ప్రయోజనాలు ఉన్నాయని ప్రచారం ఉంది.
అక్కడ ప్రత్యేక స్పా సేవలు, వెల్నెస్ ట్రీట్మెంట్లు అందుబాటులో ఉన్నాయి.
మొత్తంగా, గ్లోకేషన్ అనేది కేవలం ప్రయాణం మాత్రమే కాకుండా అందం, ఆరోగ్యం, విశ్రాంతిని కలిపిన కొత్త తరహా అనుభవంగా మారుతోంది. ముఖ్యంగా యువతలో ఈ తరహా ప్రయాణాలపై ఆసక్తి పెరుగుతోంది.
Related Stories
