ఖైరతాబాద్ మహాగణపతి దర్శనానికి భారీగా భక్తులు.. వాహనదారులకు ట్రాఫిక్ అలర్ట్

హైదరాబాద్‌లో ప్రసిద్ధి చెందిన ఖైరతాబాద్ బడా గణేశ్ దర్శనానికి భక్తులు భారీ సంఖ్యలో తరలివస్తున్నారు. ప్రతి ఏడాది ప్రత్యేక ఆకర్షణగా నిలిచే ఖైరతాబాద్ మహాగణపతిని ఈసారి 69 అడుగుల ఎత్తులో తీర్చిదిద్దారు. దీంతో గణేశ్ ఉత్సవాల సందర్భంగా భారీగా భక్తులు తరలివచ్చే అవకాశం ఉంది. సోమవారం ఉదయం మహాగణపతికి తొలిపూజ నిర్వహించనున్నారు. ఈ తొలిపూజ కార్యక్రమంలో గవర్నర్ శివప్రసాద్ శుక్లా పాల్గొననున్నారు. గణేశ్ ఉత్సవాల సందర్భంగా భక్తుల రద్దీని దృష్టిలో పెట్టుకుని హైదరాబాద్ ట్రాఫిక్ పోలీసులు ప్రత్యేక ఏర్పాట్లు చేశారు. సెప్టెంబర్ 14 నుంచి సెప్టెంబర్ 24 వరకు ఖైరతాబాద్ పరిసరాల్లో ట్రాఫిక్ ఆంక్షలు అమలులో ఉండనున్నాయి. ప్రతిరోజూ ఉదయం 11 గంటల నుంచి రాత్రి వరకు రద్దీ పరిస్థితులకు అనుగుణంగా పలు మార్గాల్లో వాహనాలను మళ్లించనున్నారు. దీంతో ఖైరతాబాద్ మహాగణపతి దర్శనానికి వచ్చే భక్తులతో పాటు సాధారణ వాహనదారులు కూడా ట్రాఫిక్ మార్పులను గమనించి ప్రయాణించాలని అధికారులు సూచిస్తున్నారు. వీవీ విగ్రహం వైపు నుంచి వచ్చే వాహనాలను నిరంకారి జంక్షన్ వైపు మళ్లించనున్నారు. పాత పీఎస్ సైఫాబాద్ వైపు నుంచి వచ్చే వాహనాలను ఇక్బాల్ మినార్ వైపు మళ్లించేలా ఏర్పాట్లు చేశారు. నెక్లెస్ రోటరీ నుంచి మింట్ కాంపౌండ్ వైపు వెళ్లే ట్రాఫిక్‌కు అనుమతి నిరాకరించారు. అలాగే నిరంకారి నుంచి ఖైరతాబాద్ రైల్వే గేట్ వైపు వాహనాల రాకపోకలను నిలిపివేయనున్నారు. ఖైరతాబాద్, సైఫాబాద్, మింట్ కాంపౌండ్, ఎన్టీఆర్ మార్గ్, సెక్రటేరియట్ జంక్షన్, మాసాబ్ ట్యాంక్ తదితర ప్రాంతాల్లో భారీగా ట్రాఫిక్ జామ్ అయ్యే అవకాశం ఉందని ట్రాఫిక్ పోలీసులు తెలిపారు. ఈ ప్రాంతాల మీదుగా ప్రయాణించే వాహనదారులు వీలైనంత వరకు ప్రత్యామ్నాయ మార్గాలను ఎంచుకోవాలని సూచించారు. ఉత్సవాల సమయంలో భక్తుల రద్దీ పెరిగే కొద్దీ ట్రాఫిక్ పరిస్థితులను బట్టి మరిన్ని మార్గాల్లో కూడా వాహనాల మళ్లింపు ఉండే అవకాశం ఉంది. ఖైరతాబాద్ మహాగణపతి దర్శనానికి వచ్చే భక్తుల సౌకర్యార్థం ప్రత్యేక పార్కింగ్ ఏర్పాట్లు కూడా చేశారు. రేస్ కోర్స్ రోడ్, ఎన్టీఆర్ ఘాట్, ఐమ్యాక్స్ పక్కన ఉన్న హెచ్‌ఎండీఏ పార్కింగ్ ప్రాంతం, విశ్వేశ్వరయ్య భవన్ తదితర ప్రాంతాల్లో వాహనాలను పార్క్ చేసుకునే సదుపాయం కల్పించారు. భక్తులు ట్రాఫిక్ ఆంక్షలను పాటిస్తూ సూచించిన పార్కింగ్ ప్రాంతాలను వినియోగించుకోవాలని అధికారులు కోరుతున్నారు. గణేశ్ ఉత్సవాలు కొనసాగుతున్న సమయంలో ఖైరతాబాద్ పరిసరాల్లో రద్దీ అధికంగా ఉండే అవకాశం ఉన్నందున వాహనదారులు ముందుగానే తమ ప్రయాణాన్ని ప్లాన్ చేసుకోవడం మంచిది. ట్రాఫిక్ పోలీసుల సూచనలను పాటిస్తూ ప్రత్యామ్నాయ మార్గాల్లో ప్రయాణిస్తే ఇబ్బందులను తగ్గించుకోవచ్చు. మరోవైపు ఖైరతాబాద్ మహాగణపతి దర్శనం కోసం భారీ సంఖ్యలో భక్తులు తరలివస్తుండటంతో ఉత్సవ ప్రాంతంలో సందడి నెలకొంది.