నేపాల్ నుంచి అమెరికా వరకు.. ప్రపంచవ్యాప్తంగా ప్రసిద్ధి చెందిన గణపతి ఆలయాలు

వినాయక చవితి అంటే కేవలం భారత్‌లోనే కాదు.. ప్రపంచంలోని అనేక దేశాల్లోనూ భక్తి శ్రద్ధలతో జరుపుకునే పండుగ. భారతీయ సంస్కృతి, సంప్రదాయాలు ప్రపంచవ్యాప్తంగా విస్తరించడంతో విదేశాల్లో కూడా గణపతికి ప్రత్యేక ఆలయాలు ఏర్పడ్డాయి. నేపాల్‌లోని భక్తపూర్ ప్రాంతంలో ఉన్న సూర్య వినాయక ఆలయం ప్రముఖ గణపతి క్షేత్రాల్లో ఒకటి. ఖాట్మాండు లోయలోని నాలుగు ప్రధాన వినాయక ఆలయాల్లో ఇది ప్రత్యేక గుర్తింపు పొందింది. నేపాల్‌లోనే మరో ప్రసిద్ధ క్షేత్రంగా జల వినాయక ఆలయం కూడా ఉంది. మలేషియాలోని సెలంగోర్ ప్రాంతంలో ఉన్న శ్రీ సితి వినాయగర్ ఆలయం గణపతి భక్తులకు ముఖ్యమైన పుణ్యస్థలంగా నిలిచింది. దీనిని స్థానికంగా పిజె పిళ్లైయార్ ఆలయం అని కూడా పిలుస్తారు. సింగపూర్‌లోని శ్రీ సెంపగ వినాయగర్ ఆలయానికి కూడా ప్రత్యేక చరిత్ర ఉంది. నెదర్లాండ్స్‌లోని డెన్ హెల్డర్ ప్రాంతంలో ఉన్న శ్రీ వరతరాజ సెల్వవినాయక ఆలయం అక్కడి ప్రముఖ గణపతి ఆలయాల్లో ఒకటి. శ్రీలంక నుంచి వచ్చిన తమిళులు ఈ ఆలయాన్ని నిర్మించినట్లు సమాచారం. అమెరికాలోని న్యూయార్క్ పరిధిలో ఉన్న శ్రీ మహావల్లభ వినాయక ఆలయం భక్తులకు ముఖ్యమైన ఆధ్యాత్మిక కేంద్రంగా ఉంది. దేశాలు వేరైనా గణపతిపై భక్తి మాత్రం ప్రపంచవ్యాప్తంగా కొనసాగుతోంది. విదేశాల్లోని ఈ ఆలయాలు భారతీయ సంస్కృతి, ఆధ్యాత్మిక సంప్రదాయాలకు ప్రతీకలుగా నిలుస్తున్నాయి.