శ్రీవారి బ్రహ్మోత్సవాలకు ప్రత్యేక భద్రత.. 61 బస్సుల తనిఖీ

శ్రీవారి సాలకట్ల బ్రహ్మోత్సవాల సందర్భంగా తిరుపతిలో భక్తుల రాకపోకలకు ఎలాంటి ఇబ్బందులు, ప్రమాదాలు తలెత్తకుండా ఆంధ్రప్రదేశ్ ప్రభుత్వం ప్రత్యేక రహదారి భద్రతా చర్యలు చేపట్టింది. భక్తులు సురక్షితంగా ప్రయాణించేలా రవాణా, పోలీస్ శాఖల అధికారులు సంయుక్తంగా తనిఖీలు నిర్వహిస్తున్నారు. బ్రహ్మోత్సవాల సమయంలో భక్తుల రద్దీ ఎక్కువగా ఉండే నేపథ్యంలో కాంట్రాక్ట్ క్యారేజ్ బస్సులపై రవాణా శాఖ అధికారులు ప్రత్యేక నిఘా పెట్టారు. ముఖ్యంగా డ్రైవర్లు నిద్రమత్తు లేదా అలసటతో వాహనాలు నడపకుండా చర్యలు తీసుకుంటున్నారు. ఇందులో భాగంగా టోల్‌గేట్ల వద్ద ‘స్టాప్ అండ్ వాష్’ కార్యక్రమాన్ని నిర్వహిస్తున్నారు. దీని ద్వారా డ్రైవర్లు కొంతసేపు విశ్రాంతి తీసుకుని, అప్రమత్తంగా వాహనాలు నడిపేలా అధికారులు సూచిస్తున్నారు. డీటీవో కొర్రపాటి మురళీ మోహన్ తెలిపిన వివరాల ప్రకారం.. పదిరోజుల్లో 61 కాంట్రాక్ట్ క్యారేజ్ బస్సులను అధికారులు తనిఖీ చేశారు. నిబంధనలు ఉల్లంఘించిన బస్సులపై చర్యలు తీసుకుని మొత్తం రూ.6 లక్షల జరిమానా వసూలు చేసినట్లు వెల్లడించారు. డ్రైవర్లు నిద్రమత్తుతో వాహనాలు నడిపితే ప్రమాదాలకు అవకాశం ఉంటుందని అధికారులు హెచ్చరించారు. ఈ తనిఖీల్లో ఎంవీఐలు శ్రీనివాసరావు, అతికానాజ్, సుబ్రహ్మణ్యం, దామోదర్ నాయుడు, మోహన్ కుమార్, రమణ నాయక్ తదితరులు పాల్గొన్నారు. బ్రహ్మోత్సవాలకు వచ్చే భక్తుల ప్రయాణం సురక్షితంగా ఉండేలా రవాణా శాఖ అధికారులు నిరంతరం పర్యవేక్షణ కొనసాగిస్తున్నారు.