ఒక వ్యక్తికి ఎన్ని బ్యాంక్ అకౌంట్లు ఉండాలి? ఇలా చేస్తే లాభాలే లాభాలు

ఒక వ్యక్తికి ఎన్ని బ్యాంక్ ఖాతాలు ఉండాలి అనే విషయం చాలామందికి సందేహంగా ఉంటుంది. ప్రస్తుతం చాలా మంది తమ అవసరాలకు అనుగుణంగా ఒకటి కంటే ఎక్కువ బ్యాంక్ అకౌంట్లను నిర్వహిస్తున్నారు. ఉద్యోగులు సాధారణంగా శాలరీ అకౌంట్‌తో పాటు సేవింగ్స్ అకౌంట్ కలిగి ఉంటారు. వ్యాపారులు కరెంట్ అకౌంట్‌తో పాటు ఇతర పొదుపు ఖాతాలను ఉపయోగిస్తుంటారు. డబ్బును సులభంగా నిర్వహించుకోవడానికి రెండు బ్యాంక్ ఖాతాలు ఉపయోగకరంగా ఉంటాయని నిపుణులు చెబుతున్నారు. ఒక ఖాతాను జీతం, రోజువారీ ఖర్చులు, బిల్లుల చెల్లింపులకు ఉపయోగించవచ్చు. మరో ఖాతాను పొదుపు కోసం ప్రత్యేకంగా ఉంచుకోవడం వల్ల ప్రతి నెల ఎంత ఖర్చు అవుతోంది, ఎంత మొత్తం ఆదా అవుతోంది అనేది స్పష్టంగా తెలుస్తుంది. స్టాక్ మార్కెట్, మ్యూచువల్ ఫండ్స్ వంటి పెట్టుబడులు చేసే వారు ప్రత్యేక ఖాతాను నిర్వహించడం ద్వారా ఆర్థిక లావాదేవీలను సులభంగా గమనించవచ్చు. ఆదాయ మార్గాలు ఎక్కువగా ఉన్నవారు లేదా ప్రత్యేక బ్యాంకింగ్ సేవలు అవసరమైనప్పుడు మూడో ఖాతా కూడా ఉపయోగపడుతుంది. అయితే అవసరానికి మించి ఎక్కువ బ్యాంక్ ఖాతాలు నిర్వహించడం వల్ల ఇబ్బందులు ఎదురవుతాయి. ప్రతి ఖాతాకు కనీస బ్యాలెన్స్, ఏటీఎం కార్డ్, ఎస్‌ఎంఎస్ అలర్ట్ వంటి ఛార్జీలు ఉండే అవకాశం ఉంది. ఖాతాలను సరిగా నిర్వహించకపోతే అదనపు ఖర్చులు పెరుగుతాయి. వేర్వేరు బ్యాంకుల్లో ఖాతాలు కలిగి ఉండటం వల్ల డిపాజిట్లకు రక్షణ కూడా లభించవచ్చు. DICGC నిబంధనల ప్రకారం డిపాజిట్లు, వడ్డీపై రూ.5 లక్షల వరకు బీమా రక్షణ ఉంటుంది. అందువల్ల వ్యక్తిగత అవసరాలకు అనుగుణంగా రెండు లేదా మూడు ఖాతాలు సరిపోతాయి. అవసరం లేని ఖాతాలను కొనసాగించడం కంటే సరైన నిర్వహణ ముఖ్యం.