వరుస సెలవులతో తిరుమలకు పోటెత్తిన భక్తులు.. మూడు రోజుల్లో 33 వేల వాహనాలు

కలియుగ ప్రత్యక్ష దైవం శ్రీ వేంకటేశ్వరస్వామి దర్శనానికి భక్తులు భారీగా తరలివచ్చారు. వరుస సెలవుల నేపథ్యంలో తిరుమలలో భక్తుల రద్దీతో పాటు వాహనాల సంఖ్య కూడా గణనీయంగా పెరిగింది.గత మూడు రోజుల్లో దాదాపు 33 వేల వాహనాలు తిరుమలకు చేరుకున్నట్లు అధికారులు వెల్లడించారు. రెండో శనివారం, ఆదివారం సెలవు దినాలు కావడంతో తిరుమలకు వచ్చే భక్తుల సంఖ్య పెరిగింది. దీంతో అలిపిరి తనిఖీ కేంద్రం వద్ద వాహనాల రద్దీ అధికంగా కనిపించింది.శనివారం ఒక్కరోజే దాదాపు 12 వేల వాహనాలు తిరుమల కొండపైకి వెళ్లాయి. ఆదివారం మరో 11 వేల వాహనాలు చేరుకున్నాయి.సోమవారం కూడా రద్దీ కొనసాగింది. సాయంత్రం సమయానికి దాదాపు 10 వేల వాహనాలు తిరుమలకు చేరుకున్నట్లు అధికారులు తెలిపారు.వాహనాల సంఖ్య పెరగడంతో అలిపిరి తనిఖీ కేంద్రం నుంచి గరుడ సర్కిల్ మీదుగా జూపార్కు రోడ్డులోని సైన్స్ సెంటర్ వరకు రద్దీ కనిపించింది.ఇటీవలి కాలంలో సొంత వాహనాల్లో తిరుమలకు వచ్చే భక్తుల సంఖ్య పెరుగుతోందని అధికారులు తెలిపారు. రోజుకు సగటున 10 వేల వాహనాలు తిరుమలకు రాకపోకలు సాగిస్తున్నట్లు పేర్కొన్నారు. భక్తుల రద్దీ పెరుగుతున్న నేపథ్యంలో వాహనాల నియంత్రణ, తనిఖీలు, ఘాట్ రోడ్డు నిర్వహణపై అధికారులు ప్రత్యేక దృష్టి పెడుతున్నారు.తిరుమలకు వచ్చే భక్తులకు ఎలాంటి ఇబ్బందులు కలగకుండా అవసరమైన చర్యలు తీసుకుంటున్నట్లు అధికారులు వెల్లడించారు.