షార్ట్‌కట్‌లతో విజయం రాదు.. కష్టపాటే అసలైన మార్గం: ప్రధాని మోదీ

ప్రస్తుత రీల్స్ యుగంలో యువత త్వరగా విజయం సాధించాలనే ఆలోచనతో షార్ట్‌కట్‌ల వైపు ఆకర్షితులవుతున్నారని ప్రధాని నరేంద్ర మోదీ హెచ్చరించారు. తాత్కాలిక గుర్తింపు కోసం సోషల్ మీడియా ప్రభావంతో అడ్డదారులు ఎంచుకోవడం ప్రమాదకరమని సూచించారు. ఢిల్లీలో మాజీ రాష్ట్రపతి రామ్‌నాథ్ కోవింద్ రచించిన ‘ట్రయంఫ్ ఆఫ్ ఇండియన్ రిపబ్లిక్: మై లైఫ్, మై స్ట్రగుల్స్’ పుస్తక ఆవిష్కరణ కార్యక్రమంలో ప్రధాని మోదీ మాట్లాడారు. జీవితంలో ముందుకు వెళ్లేందుకు నిజమైన షార్ట్‌కట్ అంటే గొప్ప వ్యక్తుల జీవితాలను చదివి, వారి అనుభవాల నుంచి నేర్చుకోవడమేనని తెలిపారు. కష్టాలు, పోరాటాలు, పట్టుదలతో ఎదిగిన వ్యక్తుల జీవితాలు యువతకు సరైన మార్గాన్ని చూపుతాయని మోదీ పేర్కొన్నారు. సోషల్ మీడియాలో కనిపించే తక్షణ విజయాల వెనుక ఉన్న వాస్తవాలను గుర్తించాలని సూచించారు. మాజీ రాష్ట్రపతి రామ్‌నాథ్ కోవింద్ పదవీ విరమణ అనంతరం కూడా దేశానికి సంబంధించిన అంశాలపై పనిచేస్తున్నారని ప్రధాని ప్రశంసించారు. ముఖ్యంగా ‘ఒక దేశం-ఒకే ఎన్నిక’ విధానంపై ఆయన చేసిన అధ్యయనం ప్రజాస్వామ్య వ్యవస్థలో కొత్త చర్చలకు దోహదపడుతుందని అన్నారు. ఈ సందర్భంగా రామ్‌నాథ్ కోవింద్ మాట్లాడుతూ ప్రధాని మోదీ సాధారణ కార్యకర్తలతో సైతం సన్నిహితంగా ఉంటారని తెలిపారు. దేశ ప్రయోజనాలకు ప్రాధాన్యం ఇవ్వడం తన రాజకీయ ప్రయాణంలో ముఖ్యమైన సూత్రమని చెప్పారు. యువత జీవితంలో విజయాన్ని సాధించాలంటే తాత్కాలిక మార్గాల కంటే క్రమశిక్షణ, శ్రమ, నిరంతర అభ్యాసమే ముఖ్యమనే సందేశాన్ని ప్రధాని మోదీ ఇచ్చారు.