చూస్తే నిజమైన చేపే అనుకుంటారు.. కానీ ఇది రోబో! చైనా శాస్త్రవేత్తల అద్భుతం

ఇంటర్నెట్ డెస్క్: ప్రపంచవ్యాప్తంగా సాంకేతికత వేగంగా అభివృద్ధి చెందుతోంది. మనుషులు, జంతువులు, పక్షులను పోలిన రోబోట్‌లను రూపొందిస్తున్న శాస్త్రవేత్తలు ఇప్పుడు జలచరాల కదలికలను కూడా రోబోటిక్ టెక్నాలజీలోకి తీసుకొస్తున్నారు. ఈ క్రమంలో చైనా శాస్త్రవేత్తలు రూపొందించిన ఓ బయోనిక్ ఫిష్ రోబోట్ ప్రస్తుతం అందరి దృష్టిని ఆకర్షిస్తోంది. చూడటానికి అచ్చం నిజమైన చేపలా కనిపించే ఈ రోబోట్‌ను నీటిలో ఉంచినప్పుడు కూడా దాని కదలికలు ఆశ్చర్యపరిచేలా ఉన్నాయి. ఓ వ్యక్తి నీటితో నిండిన తొట్టిలో ఈ రోబోటిక్ చేపను వేయగా.. అది నిజమైన చేప మాదిరిగానే సహజంగా ఈదుతూ కనిపించింది. దీంతో దీనికి సంబంధించిన వీడియో సోషల్ మీడియాలో వైరల్‌గా మారింది. వీడియో చూసిన నెటిజన్లు రోబోట్‌ను గుర్తించడం కూడా కష్టంగా ఉందంటూ ఆశ్చర్యం వ్యక్తం చేస్తున్నారు. ఈ బయోనిక్ ఫిష్‌ను రూపొందించే సమయంలో శాస్త్రవేత్తలు నిజమైన చేపల సహజ కదలికలను నిశితంగా పరిశీలించినట్లు సమాచారం. చేపలు నీటిలో ప్రయాణించే సమయంలో శరీరం, తోకను ఎలా కదిలిస్తాయి, దిశను ఎలా మార్చుకుంటాయి అనే అంశాలను అధ్యయనం చేసి రోబోట్‌ను అభివృద్ధి చేశారు. భవిష్యత్తులో ఇలాంటి బయోనిక్ జలచర రోబోట్‌లను నీటి అడుగున పరిశోధనలు, సముద్ర జీవుల పరిశీలన, పర్యావరణ అధ్యయనాలు వంటి రంగాల్లో ఉపయోగించే అవకాశం ఉందని సాంకేతిక నిపుణులు భావిస్తున్నారు.