యూరియా కోసం అష్టకష్టాలు.. రైతులకు తప్పని ఇబ్బందులు!

సిద్దిపేట: యూరియా కొరతతో సిద్దిపేట డివిజన్‌ పరిధిలో రైతులు తీవ్ర ఇబ్బందులు ఎదుర్కొంటున్నారు. కేంద్ర, రాష్ట్ర ప్రభుత్వాలు ప్రవేశపెట్టిన ఎరువుల యాప్‌లో సాంకేతిక సమస్యలు రైతుల కష్టాలను మరింత పెంచుతున్నాయి. యూరియా స్టాక్‌ వివరాలు యాప్‌లో అప్‌లోడ్‌ చేసిన కొద్ది నిమిషాల్లోనే స్టాక్‌ అయిపోతుండటంతో రైతులు ఆందోళన చెందుతున్నారు. సర్వర్‌ డౌన్‌ కావడం, ఓటీపీలు ఆలస్యంగా రావడం, స్టాక్‌ లేకపోయినా బుకింగ్‌లు కొనసాగడం వంటి సమస్యలు ఎదురవుతున్నాయి. సిద్దిపేట వ్యవసాయ డివిజన్‌లో గతేడాది 86 వేల ఎకరాల్లో వరి సాగు చేయగా, ఈ వానకాలంలో అది 73 వేల ఎకరాలకు తగ్గింది. రైతులు వరికి బదులుగా కంది, మొక్కజొన్న వంటి ఆరుతడి పంటల వైపు మొగ్గుచూపారు. అయినప్పటికీ యూరియాకు డిమాండ్‌ కొనసాగుతోంది. ఈ సీజన్‌లో సుమారు 12 వేల మెట్రిక్‌ టన్నుల యూరియా అవసరం కాగా, ఇప్పటివరకు కేవలం 4,500 మెట్రిక్‌ టన్నులు మాత్రమే సరఫరా అయినట్లు అధికారులు చెబుతున్నారు. మరోవైపు నంగునూరు మండలంలోని వెంకటాపూర్‌ మురుదాబాద్‌, మైసంపల్లి గ్రామాల పేర్లు ఎరువుల యాప్‌లో కనిపించకపోవడం మరో సమస్యగా మారింది. ఫార్మర్‌ రిజిస్ట్రేషన్‌లో గ్రామాల వివరాలు లేకపోవడం, ఎల్‌జీ కోడ్లు మ్యాప్‌ కాకపోవడంతో ఆయా గ్రామాల రైతులు యూరియా బుకింగ్‌ చేసుకోలేకపోతున్నారు. దీంతో ఇతర గ్రామాలకు వెళ్లి ఎరువులు తెచ్చుకోవాల్సిన పరిస్థితి ఏర్పడింది. దౌల్తాబాద్‌ మండలంలోనూ యూరియా కొరత రైతులను ఇబ్బందులకు గురిచేస్తోంది. జిల్లావ్యాప్తంగా ఈ వానకాలంలో సుమారు 6 లక్షల ఎకరాల్లో వివిధ పంటలు సాగయ్యాయి. ఇందులో 3 లక్షలకుపైగా ఎకరాల్లో వరి, 75 వేల ఎకరాల్లో పత్తి, 80 వేల ఎకరాల్లో మొక్కజొన్న, లక్ష ఎకరాల్లో మిర్చి, ఇతర కూరగాయ పంటలు సాగవుతున్నాయి. యూరియా సకాలంలో అందకపోవడంతో పంటల ఎదుగుదలపై ప్రభావం పడుతుందని రైతులు ఆందోళన వ్యక్తం చేస్తున్నారు. యాప్‌లో సాంకేతిక సమస్యలను వెంటనే పరిష్కరించి, డిమాండ్‌కు అనుగుణంగా యూరియా సరఫరా పెంచాలని రైతులు కోరుతున్నారు. గ్రామాల వివరాలు, ఎల్‌జీ కోడ్లు, స్టాక్‌ సమాచారం సక్రమంగా అప్‌డేట్‌ చేసి బుకింగ్‌ ప్రక్రియను సులభతరం చేయాలని విజ్ఞప్తి చేస్తున్నారు. అధికారులు సమస్యలను త్వరగా పరిష్కరించి రైతులకు అవసరమైన సమయంలో యూరియా అందుబాటులోకి తీసుకురావాల్సిన అవసరం ఉంది.